على بركة الله.. أول حاجة في سلسلة #إحنا_بتوع_البوسطاط 😀 اللي بحاول أقرب فيها وجهات النظر بيننا كناس شغالين في مجال الـ Social Media Marketing وأصحاب البيزنس…
المنطقي إن مش كلنا بنعرف نعمل كل حاجة.. لما بتحصل مشكلة في الكهربا في البيت بنجيب كهربائي.. لما التكييف بيبوظ بنجيب فني تكييفات.. لما بنحتاج نعمل لوجو للمطعم الجديد بنجيب ديزاينر يعمله.. ولما بنحتاج نعمل تسويق لشغلنا على الفيسبوك بنجيب بتاع سوشيال ميديا أو Social Media Specialist .. الهري ده لخصه جدودنا بمثل مصري جميل بيقول “إدي العيش لخبازه”
طبعًا مش كل الكهربائية شاطرين وعندهم ضمير.. عشان كده بنسأل وبندّور لحد ما نلاقي حد كويس وسعره معقول.. وبمناسبة السعر برضو فيه حاجة اسمها “الغالي تمنه فيه” .. سواء بقى الغالي ده مبالغ فيه ولا غلاء منطقي.. بس هو في الأغلب فيه حاجات إضافية أو حاجات أحسن بالمقارنة بالأرخص.
فانت مبدئيًا كصاحب بيزنس لازم وانت بتفكر في خطوة التسويق على الفيسبوك تحط قدامك النقطتين دول:
إدي العيش لخبازه .. والغالي تمنه فيه
ليه بقى؟
عشان انت سواء كنت شغلانة السوشال ميديا دي مش شغلتك.. أو حتى شايف إن ممكن تعملها لنفسك بس وقتك مش مساعد.. فانت لجأت لحد يقوم بالمهمة عشان دي شغلته ووقته مخصص ليها.. مش بس كده.. لأ ده مذاكرته وقراءاته وتطوير مهاراته مركزة عليها.. عنده خبرة ولو شهر واحد فيها وفيه اللي عنده أكتر من 7 سنين خبرة.. محتك بالناس اللي زيه وبيتبادل معاهم الخبرات والتقنيات والأساليب الجديدة وحلول المشاكل.. يوم لما انت هتكون مش فاهم حاجة هتسأله هو وبس.. ويوم لما هو يكون عنده سؤال هيسأل 50 واحد وهيجاوبوا عليه.. فمش من الحكمة ولا الذكاء ولا مبادئ البيزنس إنك بعد كل ده تبتدي تتدخل في أدق تفاصيل شغله لدرجة إنه يتحول لمجرد آداة بتشتغل بيها.. ما هو انت مش جايب شاكوش ولا مفك 😀 .. ده بني آدم عنده عقله وأسلوبه وخبراته ومهاراته وانت اللي لجأتله أصلًا من الأول.. (إلا بقى إذا كان اتفاقكم من البداية كان إن دوره ما يفرقش حاجة عن الشاكوش.. تقوله يدق المسمار بيدق .. كده ربنا يهنيكم ببعض بقى 😀 )
وخلي بالك من حاجة.. أكتر واحد تخاف منه هو اللي تتدخل في شغله وينفذلك اللي انت عايزه من غير مناقشة.. ده من الآخر واخد الموضوع سبوبة فقط وانت في نظره شوال فلوس.. فطالما بياخد فلوسه هيبقى معاك في أي عك تطلبه طالما هياخد فلوسه.. حتى لو هو عارف كويس إنه عك..
النوع اللي أحسن من ده هو واحد هتقوله اقتراح فيقولك لأ ما ينفعش وده غلط عشان كذا وكذا.. ولما يقولك كده هيبقى قدامك طريقين.. هتسمع كلامه باعتبار إن ده شغله وإنه متحمل المسؤولية بحيث لما يفشل هتحاسبه والمفروض هيكون قادر يحل الفشل ده ويتعلم منه ويظبط الشغل أكترلو استمريتوا مع بعض .. أو هتصمم على رأيك فهو بكل بساطة هيقولك قشطة انت حر دي فلوسك والبيزنس بتاعك وهيعمل لك اللي انت عايزه.. وساعتها لو حصل فشل فهيبقى فشل مضاعف بالنسبالك لأنك جايب واحد مخصوص عشان يقوم بشغل معين وبتدفعله فلوس وفي الآخر بناءًا على طلبك بيعمل حاجة غلط.. اللي هو عملت مجهود ع الفاضي وحطيت التاتش بتاعك وكمان دفعت فلوس في حاجة فاشلة .. موت وخراب ديار يعني ما شاء الله ..
فيه بقى النوع المثالي اللي مش هتقابله بسهولة وهو نفسه ممكن يعملها مرة ومرة تانية ولأ.. اللي هو هتطلب منه حاجة من وجهة نظره الفنية تعتبر عك.. فهيقولك لأ ده غلط وما ينفعش عشان كذا وكذا… لو صممت هيقولك لأ خلاص أنا آسف مش هينفع أبوظ السي في بتاعي بشغل بالشكل ده.. وهيسيبك ويمشي… أو في أحسن الحالات هيوافق على العك مرة لكن في المرة اللي بعدها هيسيبك برضو..
الخلاصة
– لو انت صاحب بيزنس وقررت تجيب حد يتولى مسؤولية التسويق الإلكتروني لشغلك.. اختار حد بيفهم.. شاطر .. أمين.. اعمله انترفيوهات وشوف شغله القديم كأنه موظف جديد بتوظفه.. واتفقوا على مستهدفات واضحة.. عشان ترمي عليه المسؤولية وتدي العيش لخبازه وتسيبه ينطلق.. وحط قواعد من البداية ومستهدفات وما تتدخلش في شغله غير في نطاق الملاحظات أو لو أصلًا هتغير استراتيجية البيزنس بالكامل فطبيعي حاجات كتير هتتغير، من ضمنها استراتيجية التسويق.
– التسويق الإلكتروني زي أي حاجة.. الغالي تمنه فيه.. فشوف بقى انت عايز حد بيفهم وكويس ولا مجرد واحد واخد الموضوع سبوبة وبيسمع كلامك وخلاص.. شوف عايز شغل نضيف ولا مجرد “يكون عندك صفحة فيس” تتفشخر بيها.. ومش عيب تكون الفشخرة هدفك بس مهم تكون مستوعب إن ده هدفك وما تطلبش أكتر من كده.
بس خلي بالك.. مبدأ “إدي العيش لخبازه” ده عشان يتطبق محتاج اشتراطات عشان ماحدش يتضر.. هتكلم عنها المرة الجاية إن شاء الله.
