لو انت صاحب بيزنس.. عندك مشروع صغير أو متوسط عايز تكسب من وراه وقررت تلجأ لتسويق شغلك عن طريق الفيسبوك أو السوشيال ميديا أو التسويق الإلكتروني عمومًا.. لازم تبقى جاهز بمجموعة حاجات الأول قبل ما تجيب حد يدير صفحة الفيسبوك بتاعتك وتبتدي تحلم إنها هتجيبلك أرباح والدنيا تبقى جميلة..
1. يكون البيزنس ليه اسم ولوجو ..
وارد طبعًا المتخصص في السوشيال ميديا يساعدك باقتراحات.. بس ده مش شغله ومش هيعرف طبعًا يبدأ شغله من غير ما يكون عارف اسم الحاجة اللي شغال عليها.. ده غير إنه من الاسم ده فقط ممكن يطلع بأفكار كتير.
2. المعلومات الأساسية..
انت بتبيع إيه ومميزاته إيه وبكام؟.. وأي معلومات لا غنى عنها من النوع ده.
مين جمهورك؟ .. مهم قبل ما تتفق مع شخص يدير صفحة الفيسبوك تكون محدد انت عايز تبيع لمين.. رجالة؟ ستات؟ .. أعمارهم إيه؟ .. ثقافتهم.. بلدهم.. ساكنين فين.. اهتمامتهم.. نظرتهم للحياة عمومًا .. إزاي بياخدوا قرار الشراء؟ .. بيشتروا منين؟.. وأي حاجة بتوصف جمهورك (طبعًا الكلام ده أي حد بيشتغل في الماركتنج لازم يكون فاهمه سواء سوشيال ميديا ماركتنج أو غيره.. بس المتخصص في السوشيال ميديا مش شغلته إنه يحدد الكلام ده.. انت اللي بتكون محدد ده سواء انت بتفهم فيه أو بتستعين بحد متخصص.. بعدين بتروح للمتخصص في السوشال ميديا وبتقوله عايزك تشتغل على الجمهور اللي مواصفاته كذا كذا)
3. الصورة الذهنية للبيزنس بتاعك..
يعني انت مين و عايز الناس تشوفك ازاي؟ انت مكان بيقدم جودة عالية؟ ولا مكان بيقدم سعر حلو؟ ولا مكان عنده خدمة ما بعد البيع وصيانة محترمة؟ مكان بيستهدف فئة معينة ولا أي حد ممكن يشتري منه؟ بتشوف زباينك مجرد زباين ولا عايز بينك وبينهم علاقة ودية أكتر كأنكم أصدقاء مثلًا؟ .. انت شبابي ولا لكل الأعمار؟ مرح ولا جاد؟ إيقاعك سريع ولا حكيم ورزين؟ تصميماتك عادية ولا مميزة ولا مجنونة؟ … وأي تفاصيل بتوصفك انت كبيزنس (مثلًا الصورة الذهنية لكوكاكولا إنها شبابية أكتر بتتكلم عن السعادة والجنان والاستمتاع بالحياة والشباب والنشاط.. الصورة الذهنية لأيكيا هي مكان حديث وراقي بيقدم أثاث مناسب بتصميمات حديثة.. وهكذا..)
4. انت عايز إيه من الفيسبوك؟
إيه هدفك من ورا خطوة الفيسبوك دي أصلًا؟ عايز الناس تعرف اسم البيزنس بتاعك بس؟ ولا عايزهم يتصلوا بيك يسألوا على اللي بتقدمه؟ ولا عايزهم يزوروا المكان؟ ولا عايز تعرفهم بعروضك؟ ولا عايز يبقى عندك صفحة كبيرة نشطة فيها Likes كتير عشان تدي للبيزنس بتاعك ثقة عند الناس وشكل حلو؟ ولا عايزهم يشتروا؟ ولا إيه؟
حدد كل ده مع نفسك الأول وبعدين كلم إبراهيم ولا آية ولا سارة ولا معتز قولهم أنا عايز حد يمسك صفحة الفيسبوك بتاعتي ودي كل حاجة عايزين تعرفوها عني..
ساعتها هترتاح وهما هيرتاحوا والشغل هيطلع بشكل أحسن ومنظم والنجاح هيبقى منطقي..
إنما بقى إنك ما يبقاش عندك غير اسم المكان وكلمتين عن منتجاته وعايز تعمل صفحة فيسبوك… هتتعب كتير وهتضيع وقت وهتجرب ناس كتير لحد ما هتستوعب المشكلة فين.. ده لو استوعبتها.. ولحد ما تستوعبها هتكون ضيعت وقت وجهد وفلوس كان ممكن العائد بتاعها يكون أحسن كتير لو انت من البداية شغال بشكل منظم احترافي.. مش بالحب والنوايا الطيبة.
[…] بعد ما جهزت كل حاجة تخص البيزنس بتاعك.. وجهزت الحاجات اللي هيحتاجها بتاع السوشال ميديا اللي اتكلمت عنها في البوست اللي فات: إحنا بتوع البوسطاط (2) – كفاية شغل بالحب […]