بعد ما جهزت كل حاجة تخص البيزنس بتاعك.. وجهزت الحاجات اللي هيحتاجها بتاع السوشال ميديا اللي اتكلمت عنها في البوست اللي فات: إحنا بتوع البوسطاط (2) – كفاية شغل بالحب
بييجي الدور على الاتفاق بينك وبينه.. مبدئيًا لازم أأكد تاني على نقطة: بلاش شغل بالحب.. اتفقوا على كل حاجة عشان تبقى عارف هتحاسبوا على إيه وإيه المطلوب منه ومنك.
طيب.. هتتفقوا على إيه؟ .. عناصر الاتفاق الرئيسية هي دي واللي لا غنى عنها:
1. هيشتغل على مواقع إيه؟
فيسبوك بس ولا معاه إنستجرام أو تويتر أو كلهم أو أي حاجة إضافية زي سنابشاب أو يوتيوب مثلًا.
2. كام بوست (أو تويت) أو piece of content عمومًا في الشهر؟
3. الـ moderation على مين؟
يعني هو المسؤول عن الرد على الناس على الصفحة ولا انت ولا هتمشوها بالتناوب ولا إيه؟
4. الـ moderation ده بمعدل قد إيه؟
يعني مطلوب يرد بحد أقصى خلال ساعة؟ ولا 12 ساعة؟ ولا يوم ولا يرد فورًا ولا إيه؟
5. الـ Ads أو الـ Sponsored content أو الإعلانات أو الإعلانات الممولة.. أيًا كانت التسمية اللي تحبها.. اللي هو بوست عادي بينزل زي أي بوست بس الفرق إنك بتدفع فلوس للفيسبوك عشان البوست يوصل لناس أكتر.. فالمفروض تتفقوا ناوي تعمل إعلانات بميزانية كام؟ ولا مش ناوي وهتقضيها بوستات عادية وخلاص؟
بعد ما كل ده بيتحدد.. بيتم تحديد الأجر الشهري اللي بياخده منك الـ Social Media Specialist عشان يعمل الحاجات دي.. كل ما الحاجات دي زادت كل ما هو استحق أجر أكبر (يعني كل ما زاد عدد البوستات.. أو طلبت منه يرد ويتفاعل مع الناس على الصفحة بشكل أسرع.. أجره بيزيد.. وهكذا)
ده ببساطة شديدة، وطبعًا كل نقطة من دول بينتج عنها ترتيبات سواء من ناحيتك أو من ناحيته.. بس مبدئيًا لازم تتحدد ويتم الاتفاق عليها عشان تنتقلوا للمرحلة اللي بعد كده.
