تيشيرت منتخب مصر سئ جدًا.. تيشيرت نيجيريا رهيب.. تيشيرت كرواتيا فشيخ.. وتيشيرت البرازيل عادي..
كل ده وغيرها كتير من الآراء في تشيرتات منتخبات كاس العالم هي في النهاية معتمدة على الأذواق الشخصية بنسبة كبيرة..
قررت أعمل رصد سريع للشركات المنتجة لتيشيرتات منتخبات كاس العالم.. مين أكتر شركة حاضرة في كاس العالم ومين ركزت أكتر مع المنتخبات الكبيرة ومين راهنت على فريق مش كبير وكسبت الرهان؟ مين فريقها كمل في البطولة ومين خرج ومين اللوجو بتاعها بيكون على صدر أهم النجوم ومين شقت طريقها وسط العمالقة؟
تعالوا نشوف 😃
سيطرة أديداس ونايكي
العملاقين المسيطرين بكل جدارة على سوق التيشيرتات هما أديداس ونايكي، الاتنين مع بعض تعاونوا مع 22 منتخب من إجمالي 32 منتخب في كاس العالم.. بفرق بسيط لصالح أديداس.
ورغم إن أديداس بتتفوق في العدد الإجمالي لكن نايكي بتتفوق في إن المنتخبات العشرة بتوعها منهم 6 منتخبات ضمن أفضل 20 منتخب في العالم حسب التصنيف الأخير للفيفا قبل كاس العالم على طول، بينما أديداس كان معاها 5 منتخبات بس من الـ 20 (مع ملاحظة إن عدد من المنتخبات الـ 20 لم يتأهل لكاس العالم من الأساس لكن برضو نايكي بتتفوق بيهم على أديداس)
أبرز منتخبات أديداس: ألمانيا – الأرجنتين – بلجيكا – المكسيك.. وطبعًا مصر 😃
أبرز منتخبات نايكي: البرازيل – فرنسا – إنجلترا – البرتغال .. لكن يمكن بيميز نايكي إن معاها اتنين من أكتر التصميمات جذبًا للأنظار: نيجيريا وكرواتيا.
بعد العملاقين.. بتيجي بوما من بعيد بـ 4 منتخبات فقط (مع ملاحظة إن كمان معاها منتخب إيطاليا اللي كان عدم تأهله لكاس العالم مفاجأة تاريخية.. ومعاها الكاميرون بطلة أفريقيا اللي برضو ما تأهلتش)
وسط العمالقة بيظهر غلابة بيحاولوا يعافروا.. أبرزهم New Balance اللي يمكن اللوجو بتاعهم مألوف جدًا دلوقتي بسبب إن معاهم ليفربول بجلالة قدره واللوجو بتاعهم بيزين تيشيرت واحد من أفضل لاعبي العالم .. محمد صلاح!
في كاس العالم.. مين يكسب؟
طيب بعيدًا عن الكلام عن البطولة بشكل مجمل.. هو مين كان ليه الغلبة في المتأهلين للأدوار المتقدمة في البطولة مش مجرد المشاركة؟
مين في وقت الجد كان مسيطر؟ نايكي ولا أديداس؟
رغم إن نايكي كان معاها عدد أكبر من المنتخبات الكبيرة.. لكن المتأهلين لدور الـ 16 من فرق أديداس كانوا أكتر.. مع ملاحظة إن ألمانيا (أهم منتخب من منتخبات أديداس) خرجت من الدور الأول في أكبر مفاجأة في البطولة!
لكن نايكي في دور التمانية رجعت تتفوق تاني على أديداس بمنتخبات البرازيل وفرنسا وإنجلترا وكرواتيا.. في مواجهة بلجيكا وروسيا والسويد.. والفريق التامن كان أوروجواي مع بوما.
في قبل النهائي.. نايكي سيطرت بـ 3 فرق (فرنسا – إنجلترا – كرواتيا) في مواجهة فريق واحد من أديداس (بلجيكا).. وكان طبيعي يكون بطل العالم مع نايكي بعد وصول اتنين من “ولادها” للنهائي.. فرنسا وكرواتيا.. وفازت فرنسا بكاس العالم عشان تقرب من رصيد أديداس في عدد أبطال العالم (3 خلال آخر 5 بطولات)
جدير بالذكر إن أديداس وبوما الاتنين شركات ألمانية الأصل.. أديداس وبوما تأسسوا في نهاية الأربعينات، ونايكي أمريكية الأصل وتأسست في منتصف الستينات
آخر 5 بطولات من كاس العالم قبل روسيا 2018 كانت أديداس مكتسحة بـ 3 أبطال (فرنسا 98 – أسبانيا 2010 – ألمانيا 2014) في مقابل بطل واحد لنايكي (البرازيل 2002) وبطل لبوما (إيطاليا 2006)… يعني ألمانيا حتى في عدم وجود منتخبها في البطولة فهي مستحوذة على تيشيرتات أبطال العالم 😃
ومع فوز فرنسا بكاس العالم 2018 بدأت تقرب نايكي من أديداس ببطل جديد ينضم للبرازيل بطل 2002.
