سؤال بيطرح نفسه: أنا كصاحب بيزنس إزاي أقيس فاعلية أو فايدة تسويق شغلي على السوشيال ميديا؟
مبدئيًا أي حاجة في الدنيا عشان يتقاس نجاحها أو العائد منها لازم نحدد أصلًا هي إيه مقاييس النجاح ده.. إيه تعريف العائد ده؟ إيه الهدف من الحاجة دي من الأساس؟
التسويق الإلكتروني عمومًا فيه ميزة عن باقي أشكال التسويق.. إن قياس نجاحه أسهل بكتير رقميًا لأنه بيوفرلك إحصائيات وبيانات تفصيلية تقدر تستدل بيها انت ماشي صح ولا غلط.. إيه الصح وإزاي تطوره وإيه الغلط وإزاي تتفاداه.
لكن أولًا انت محتاج تحدد هدفك.. وغالبًا بينحصر في 3 أهداف مجتمعين أو منفردين:
1. انتشار الوعي بين الناس عن البيزنس بتاعك..
يعني يعرفوا اسمه وبيعمل إيه وفين وازاي وبكام.. وهكذا
وده سهل قياسه بحاجات زي الـ Page Likes .. الـ Followers.. الـ Reach والـ Impressions.
..
2. بناء علاقة قوية مع الناس..
ودي ممكن قياسها بنشر محتوى على صفحتك الناس بتتفاعل معاه وبتحبه .. كلما زاد عدد الناس اللي بتتفاعل وكلما كان ده فيه استمرارية كل ما كان ده مقياس لزيادة قوة العلاقة بينك وبين الناس.. اهو ده هدف تاني وليه مقياس.
3. التواجد
ممكن يكون هدفك مجرد التواجد على الفيسبوك بشكل محترم.. نوع من أنواع التلميع والوجاهة يعني للبيزنس بتاعك وتتفشخر بالصفحة قدام الناس.. ودي مالهاش مقياس بقى 
.. عايز تتواجد؟ حصل التواجد وبمحتوى مقبول.. يبقى تمام كده الهدف اتحقق.. ممكن بقى تفكر في هدف جديد أو تكتفي بده.
طيب وبالنسبة للبيع؟
قبل ما أتكلم عن وضعك لهدف “البيع” كهدف من أهداف صفحتك على الفيسبوك لازم أقول نقطة مهمة.. هي إن مواقع التواصل الاجتماعي هدفها في الأساس (التواصل الاجتماعي).. الناس بتعرف أخبار بعض وبتنزل صورها وبتتناقش في الكورة والسياسة وبتضحك وتهزر وتعرف معلومات جديدة وأخبار..
دخول البيزنس للمنطقة دي المفروض يكون هدفه الأساسي أولًا التواجد وتعريف الناس بيه.. وثانيًا بناء علاقة قوية مع الناس.
إنما السوشال ميديا مش آداة من أدوات البيع المباشر.. وبالتالي لا ينصح باعتبارها آداة البيع الرئيسية بتاعتك لأن دي مش طبيعتها.. طبيعتها باينة من اسمها: تواصل اجتماعي.
ولكن.. تقدر برضو تقيس مدى تأثير السوشيال ميديا على حركة البيع بالنسبالك بحاجات بسيطة منها مثلًا إنك تسأل أي حد يشتري منك أو يجيلك في المكان بتاعك او يتصل بيك.. هو عرفك منين؟
وتقدر تعمل حصر بعدد الزباين أو العملاء اللي اتصلوا بيك أو زاروك بسبب الفيسبوك وتدي قيمة مالية افتراضية لكل عميل .. بحيث تقدر تقيس العائد من مصاريفك على السوشال ميديا بشكل ولو تقريبي..
يعني مثلًا الشهر ده اتصل بيك 10 عملاء.. وانت بتقدّر قيمة العميل الواحد بـ 100 جنيه.. يبقى انت كده جالك من السوشيال ميديا 1000 جنيه عائد.
طبعًا أنا بعتبر إن العائد هو بس إن العميل يتصل بيك أو يزور المكان بتاعك.. لأن مرحلة إتمام عملية البيع دي مش مسؤولية السوشيال ميديا إطلاقًا وبتعتمد على عوامل تانية كتير زي السعر والجودة وأسلوب البياع وهكذا..
يعني ما ينفعش أبيع عن طريق السوشيال ميديا؟
لأ.. ينفع.. وبيحصل.. بس ما ينفعش يبقى هدفك من السوشال ميديا البيع على المدى القريب.. السوشال ميديا هتخليك تبيع لكن على المدى البعيد لما تبني علاقة قوية طويلة المدى مع الناس عن طريق المحتوى المناسب ليهم.. فهيقربوا منك.. يثقوا فيك.. يفكروا يشتروا منك.
إنما إنك تعمل صفحة النهارده وتستنى تبيع بكرة ده مش طبيعي يحصل.. ولو حصل فهو صدفة واستثناء.. مش هو القاعدة.
